حنجرتي بتقول قووووووووووووووو

حنجرتي بتقول قوووووووووووووووو

انا برضه عندي حنجرة حلوة وساعات بغني بيها برضه بس المشكلة اني واد فقري بقول ان ممارسة الغناء والتكسب منه حرام وده رأي اخواننا البعدا ربنا يجعل كلامنا خفيف عليهم. ويمكن برضه الشكل العام مش ولابد والمهنة دي بالذات لازم يكون شكلك الخارجي يجنن عشان العملية تمشي معاك والبنات تتهبل عليك اكتر واكتر. فانا اخدت الحكاية من آصرها واشتغلت شغلانة فيها عرق وقرف عشان اعرف اقول اني بكسب من عرق جبيني جاتنا نيلة في حظنا الهباب. انا بقولكوا الكلام ده عشان كنت اعرف واحد معرفة من بعيد. المهم الواد ده كان بيغني ايام لما كان تلميذ في الكلية اياها. وبعدين خلص مدرسته ورمى كرسته وراح يغني. بس كان حليوة وصدره مافيهوش ولا شعراية من النوع اللى بيزحلق. وبعدين بقى يغني في الافراح بس بيني وبينكوا الواد ده انا كنت مستبضنه ولازلت كذلك. لعبت معاه البلية وجريت ونضف واستحمى وبقى بيلبس بدل جينس وفتح لنا صدره. الشئ لزوم الشئ . ودلوقتي بقى يغني وعنده موقع على النت والبنات اتجننت منه ياخراشي عليه. وكمان سنة ولا اتنين حيضرب عمرو دياب بالجزمة ويمسح الواد تامر حسني باستيكة. مش بقولكوا صدره بيزحلق.
اللى اعطاك يعطينا يابا
انا برضه حنجرتي بتقول قوووووووووووووووووووو