كان مرة في واحد شيخ رايح يصلي في الجامع وهو ماشي قابل واحد صاحبه اسمه برعي في السكة بس صاحبه ده كان مروح.
الشيخ: ماتيجي يا برعي تصلي معانا العصر
برعي: انا تعبان وجعان حبقى اصلي في البيت
- بيت ايه ياراجل سيبك من الكلام الفارغ ده وتعال ربنا يهديك
= والله انا فعلا تعبان ومش متوضي كمان ولسه عايز اخد دش عشان كنت عرقان وانا في الشغل
- ياسيدي الله لاينظر الى اجسادكم ولكن ينظر الى قلوبكم
= ياعم الحج مش حاينفع سيبني في حالي الله يخليك
- انت حر انت الخسران انت ماتعرفش ان صلاة الجماعة افضل من صلاة الفذ ببضع وعشرون درجة
= عارف ياسيدي بس انا حصلي في البيت انهاردة السلام عليكم
- وعليكم السلام ياسيدي بس لينا قاعدة مع بعض ان شاء الله
= ان شاء الله سلام
بالليل:
على القهوة برعي كان قاعد والشيخ معدي فشافه
الشيخ: ايه يابرعي حكايتك
= حكاية ايه مافيش خكاية ولا حاجة
- انت مش مظبوط ليه اليومين دول كنت بتصلي معانا الفرض بفرضه ودلوقتي قطعت خالص ليه؟
= ابدا مافيش حاجة
- لا انا لازم اعرف ايه الحكاية؟
= عايز تعرف ايه الحكاية حاضر ياسيدي حقولك حكاية. صلي على النبي
- عليه الصلاة والسلام يانبي
كان ياما كان في قديم الزمان مصري تعبان غلبان شقيان
يصحى الصبح من نومه يخرج لرزقه وهوه مش دريان
سايب وراه ام العيال تدعيله بالخير الكثير والعمران
راح المصري دكانه وسلم وهوه ماشي على ابو خليل وسليمان
يافتاح ياعليم يا رزاق يا كريم كلمة بيقولها كل يوم من داخل الدكان
زبيب وعطارة ورز وسكر موجودة على الرفوف والحيطان
وعنكبوت مدلدل من بين شقوق السقف وكلوب مكسور وخربان
السلام عليكم ياعم مصري ادينيي زعتر وملح وفلفل وحبهان
السلام عليكم يا ابو سعاد الحاجة دي يادووب بقرشان
طب قيد عندك عالنوتة ما بين الخيرين حسبان
ياابو سعاد أأكل عيالي منين دول خمس عيال وامهم والبطن جعان
يا مصري زعلان ليه ما انت عندك المخزن مليان
لاياعم هات الحاجة واتكل على الله احسن انا قرفان
ما تيجي تضربني وتاخدلك قلمين وشلوط كمان
انت جاي تشتري ولا تتخانق انا ماليش في الخناق والعصيان
عصيان ايه يا عم انت بتتكلم في السياسة واهل السلطان
هو انا فتحت بقي ياعم انت عايز تلبسني تهمة ده انا خلصان
يا ساتر هوه في ناس كده غلسة وغتتة وملازمة الشيطان
الله اكبر الله اكبر سمع المصري صوت الاذان
اروح اتوضى واصلي ركعتين واهدا من الغليان
السلام عليكم ورحمة الله وبركاته وبالدعوة يشكران
المصري وابو سعاد وبالايدي يشددان
جوه الجامع الكبير وامام الكل يشهدان
خرج المصري من الجامع وابراهيم وابنه الشحاذان
واقفين يترجوا الرايح وال جاي وبايديهم يمددان
والسوق باين من بعيد والجو حار والكل حران
رجع المصري من الصلاة بعد ما دعى لرب الغفران
بصاص وعسكري درك جم وقدام المحل منتظران
انت المصري ابن المصري وبدا العسكر بالسؤلان
مشي معانا للمخفر وتعالى كلم مقدم سعفان
ليه في ايه علشان ايه انا انا انا انا انا ماشي فحالي من زمان
لسان المصري بقى تقيل زي المخمور السكران
تمام يافندم كله تمام جبنالك المصري الخرفان
انت المصري ابن الكلب ده يومك طين وليلك قطران
يا فندم انا ايه تهمتي انا مش بني كلاب انا بني انسان
وكمان مش عجبك ارموه في الحجز الصعلوك الجربان
ام العيال بتدور على المصري وفي عينيها الدموع فيضان
يا ولداه ومين يدلها والكل خايف من الجلد والطغيان
سوس الجبن بينخر في العظم والسرطان سرح في الجسم العيان
طلع الصبح على المصري والنوم لم تدركه الاجفان
ياترى العيال عاملين ايه وأمهم والفكر قاتل ماله نسيان
انفتح الباب. قال يارب سمع اسمه بصوت رنان
أخذوه جروه سحبوه سحلوه ما تركوا من جسده مكان
كرباج طالع كرباج نازل وانين يزلزل جدران
وبعد ماسلخوا من لحمه حدفوه على ناصية بدران
الناس اتلمت تتفرج كالعادة وبكل حنان
رفعوه قدامهم وخدوه على بيته في شارع وهدان
ويومين وتلاتة حيعدوا ويخف المصري الحيران
ويروح المصري دكانه ويحلف اغلظ ايمان
مايروح الجامع والمسجد ده الكل منافق شيطان
فين العدل فين الحق فين الجواب الشافي البيان
وتوتة توتة خلصت الحدوتة .
0 التعليقات:
إرسال تعليق