الفرق في الفلوس

الواد حنتوفة دخل معهد خدمة اجتماعية أصله ماجبش غير 50% في الثانوية العامة وامه زعلانة جدا كان نفسها تشوفه دكتور بس الواد خيب املها فيه تعمل ايه ياحسرة بختها كده.
اما الواد شلتوفة ابن الجيران جاب برضه 50% بس ابوه كتر الله من امثاله دخله كلية بالمصاريف عشان ياخد الشهادة الكبيرة عشان يبقى باشا ابن باشا.
تمر الايام والسنين ويتخرج الواد حنتوفة من المعهد والواد شلتوفة من الكلية. طبعا الاتنين محتاجين يشتغلوا عشان يشقوا طريقهم في الحياة وكل واحد فيهم يتجوز البت بتاعته. الواد حنتوفة اشتغل سواق على عربية مندوب مبيعات قد الدنيا بيبيع مكرونة عقل. الواد شلتوفة بقه لعبت معاه البلية بالشهادة اياها ودخل شركة كبيرة مش مهم الدماغ شكلها ايه المهم شوية الابندة وحركتين من اياهم تتفتح الابواب المقفلة. ارزاق ياعم انت حتنق، ما انا عارف.  المهم سنتين تلاتة الواد حنتوفة لسه سواق على عربية شكلها اتغير شوية. اما الواد شلتوفة اسم الله عليه بقى شغال وماسك مركز تحتيه شوية عيال كده من اياهم اللي واخدين شهادات بجد وعرقانين عشان يخدوها وطفحوا الكوتة هما واللي مخلفينهم. حترجع تنق تاني ما احنا قلنا ارزاق ومتقسمة. ياعم انا قلت حاجة ما انا عارف.
المهم الحكاية كلها طلعت فلوس X فلوس وماهياش مذاكرة ولا حاجة زي ما قالولنا واحنا صغيارين واحنا صدقنا الحكاية وبقينا نذاكر. مغفلين مش كده والله؟
في الاخر تساوت الرؤوس ومابقاش حد احسن من حد
ابو فلوس=ابو دماغ
وسلملي عالترماي