جواز مرور

انا عندي جواز مرور لونه حلو ويخضور
مكتوب فيه كلام اسمي وسني على سطور
عملته بستين جنيه من جوه بولاق الدكرور
قررت باني حاسافر واشوف الدنيا يامسرور
لميت الشنطة والمخلة وعذابي وهمي المحفور
عديت من اول بوابة وسالني واحد دبور
على فين رايح ياخفيف انا قلت بلاد النور
ودخلت اخدت الكرسي طيارة تلف تدور
سعتين وتلاتة تعدي بركاتك عم عاشور
ودخلت لاول صالة وورايا صف طابور
وقفت ركبت التاكسي شباك زي المسحور
والحال بقى غير الحال نسوان زي البنور
ووشوش كده واقفة بتضحك وحياة ماتلاقي فتور
حبيت الاخت بياتريس برفان كده عم ديور
ودخلت لمصنع جرجس حبيت اعمل شطور
وسالته عن اتعابي الساعة بخمسة وفور
ازاي ده الكل بياخد اشمعنى المصري يغور
ورضيت بالحال وبلعته ومرارة تعدي في زور
وسالت الواد متولي قالي غير باسبور
اعملك واد بلجيكي او حتى الواد جريجور
دي حكاوي اتقالت قبلا عن ام الدنيا بدور
قفشوها امبارح واقفة بتمارس كل فجور
حنطور واقف يتحنطر واغاني الواد بعرور
وتقولي المصري كرامة ها ها هأ اتفضل غور
منبوذ كده بره وجوه رحماتك رب غفور
شوفت المصري اللى حصله اذا لم يصبه الدور