قالولي بتحب مصر قلت مش عارف

مايجيش في بالي هرم مايجيش في بالي نيل
مايجيش في بالي غيطان خضرا وشمس اصيل
ولا جزوع فلاحين لو يعدلوها تميل
حكم الليالي يخدهم في الحصاد محاصيل
يلبسوهم فراعنة ساعة التمثيل
وساعة الجد في سخرة واسماعيل
مايجيش في بالي عرابي ونظرته في الخيل
وسعد باشا وفريد وبقية التماثيل
ولا ام كلثوم في خمسانها ولا المنديل
الصبح في التاكسي صوتها مبوظة التسجيل
مايجيش في بالي العبور وسفارة اسرائيل
ولا الحضارة اللى واجعة دماغنا جيل ورا جيل
قالولي بتحب مصر اخدني صمت طويل
وجت في بالي ابتسامة وانتهت بعويل

الشاعر : تميم البرغوثي