اشاعة السيد ولاعة (مسرحية)
العمدة: ياواد ياحسانين افتحلنا التلفزيون عشان نشوف اخبار الدنيا ايه ياولا
حسانين: من عنيا يابا العمدة واهو بالمرة نشربلنا كوبايتين شاي
العمدة: انت ياولا مش لسه طافح كوباية من شوية ولا هو ابو بلاش كتر منه؟
حسانين: ربنا يخليك لينا يابا العمدة ويجعله عامر.
العمدة : ايوه ياخويا اشحت اشحت هو ده اللى بينوبنا منك انت والمعفنين اللى زيك . جتكم القرف مليتوا البلد.
حسانين يذهب لفتح التلفزيون.
المذيع: وقد تعافى السيد الرئيس من الوعكة الصحية التي المت به وهو الان يلعب الاسكواش مع احفاده واولاد احفاده.
العمده : انت مش ملاحظ حاجة غريبة ياواد ياحسانين؟
حسانين: حاجة ايه يابا العمدة؟
العمدة : الرئيس بتاعنا ياولا بقاله زمن موجود ده انا حتى مش عارف هو عنده كام سنة. انا كل اللى فاكره ان جدي الكبير كان بيحكلنا عنه واحنا عيال.
حسانين: ربنا يديله ويديلك طولة العمر يابا العمدة.
العمدة: الغريب في الموضوع ياولا انه لسه بيلعب اسكواش وواقف على رجليه!
حسانين: وهيا دي فيها ايه يابا العمدة؟
العمدة : انت عبيط يالا . بقولك بيلعب اسكواش. انت مش عارف الاسكواش؟
حسانين: وهيا ايه دي السكواش يابا العمدة.
العمدة: دي لعبة كده زي لعبة السيجا ياولا بس بيجروا فيها ورا بعض.
حسانين: ياسلام يابا العمدة طب ماتعلمهالي
العمدة: اعلملك ايه يالا ابن الهبلة وهو انا حمل جري
حسانين: اومال الريس بيجري ازاي ياعمدتنا.
العمدة : مش عارف يالا ماهو ده اللى محيرني . اقولك نديلي شيخ الغفر
حسانين: احنا مش حناكل يابا العمدة
العمدة: تاكل ايه يابن الدايخة وهو ده وقت اكل.
حسانين: اصل انا على لحم بطني من امبارح
العمدة: قوم يالا نادي شيخ الغفر احسن اخليه يقلعك هدومك وانت عارف الباقي
حسانين: لا خلاص حقوم اهو.
حسانين راح ينادي شيخ الغفر
شيخ الغفر: اوامرك يابا العمدة؟
العمدة: ماتعرفش ياشيخ الغفر هو الريس عنده كام سنة؟
شيخ الغفر: لا والله يابا العمدة
العمدة: يعني ماسمعتش من حد كده ولا كده بيتكلم عن عمره
شيخ الغفر: ابدا يابا العمدة بس انا فاكر زمان كانوا بيعملوا عيد ميلاده في شهر مايو
العمدة : نورت المحكمة ياروح امك
شيخ الغفر: والله ياحضرة العمدة كان فيه اشاعة دايرة في البلد حدانا ان عنده 140 سنة
العمدة: اشاعة دايرة؟ ومين اللى طلع الاشاعة دي
شيخ الغفر: مش عارف يابا العمدة
العمدة: انت قاعدلي على طيازك ومش عارف مين اللى طلع الاشاعة دي روح اجري اعرفلي ايه الحكاية وهاتلي قرار الاشاعة دي
شيخ الغفر: اوامرك يابا العمدة
حسانين بيكلم العمدة
حسانين: الله ينور عليك يابا العمدة مافيش حاجة بتفوت عليك
العمدة : انت اهبل يالا اومال انا عمدة ازاي. انا لازم اعرف كل حاجة بتدور في البلد هنا.
العمدة بينادي على سعدية
يابت ياسعدية
سعدية: ايوه يابا العمدة
العمدة: ايوه في عينك يابت روحي يابت اعملي الغدا
سعدية: من عنيا يابا العمدة
حسانين: حتعملنا ايه على الغدا يابا العمدة
العمدة: هو انت لسه حتقعد لحد الغدا ما يتعمل . قوم يالا روح بتكم
حسانين: ده انا كنت عامل حسابي اني حتغدى عندك يابا العمدة
العمدة: انت يالا على طول كده عايش سفلقة. ماتنضف شوية يامعفن.
حسانين: ربنا يخليك لينا يابا العمدة احنا من غيرك ولا حاجة.
العمدة: انت ياولا من غيري او بيا مالكوش لازمة برضه كمالة عدد وخلاص زي البقر . ده حتى البقر له لازمة.
شيخ الغفر بيخبط على الباب.
العمدة بيكلم حسانين
العمدة: قوم يالا افتح الباب
شيخ الغفر: تمام يابا العمدة جبتلك قرار الاشاعة دي.
العمدة : ايه الحكاية ياشيخ الغفر؟
شيخ الغفر: الحكاية ان فيه واحدة اسمها( اشاعة السيد ولاعة) دايرة في البلد تلسن بالكلام على ان الريس عنده 140 سنة.
العمدة : مين السيد ولاعة ده ياشيخ الغفر؟
شيخ الغفر: ده راجل حكيان عنده قيراط ارض بيزرعه برسيم وياكل منه
العمدة: بياكل من البرسيم؟
شيخ الغفر: لا انا قصدي بيبيعه وعايش بيسترزق منه.
العمده: اه اومال فين البت اشاعة دي.
شيخ الغفر: ماجبتهاش معايا انت عايزها ياحضرة العمدة؟
العمدة : انت مسطول ياشيخ الغفر اومال انا بعتك ليه اجري بسرعة هاتهالي هنا.
شيخ الغفر: اوامرك يابا العمدة.
العمدة: ياولاد العبيطة كلكم نايمين وعايزين اللى يضربكوا بالكرابيج علشان تشتغلوا مافيش حد بيشوف شغله مظبوط.
حسانين: متفورش دمك يابا العمدة صحتك بالدنيا
العمدة: اسكت انت ياجاموسة خليك في عبطك اللى انت فيه.
حسانين: حاضر يابا العمدة.
العمدة قوم يالا روح ولما حعوزك حندهلك.
حسانين: هو احنا مش حنتغدى؟
العمدة : امشي يالا احسن اقوم اضربك بالجزمة
حسانين يجري طوالي.
العمدة بيكلم نفسه : هيا ايه الحكاية بالظبط ياعمدة الاشاعات ملية البلد وانت قاعد ونايم لو الموضوع ده وصل المركز حتبقى مصيبة انا لازم اعرف الحكاية وابلغ المامور طوالي علشان مايقولوش علينا خيبة بالويبة.
سعدية: الاكل خلص يابا العمدة احطلك تاكل؟
العمدة : ايوه يابت ياسعدية بسرعة احسن انا ميت من الجوع
سعدية: حمامة يابا العمدة.
العمدة بعد مايتغدى ينام شوية ويصحى على صوت شيخ الغفر
شيخ الغفر: ياحضرة العمدة ياحضرة العمدة
العمدة: فيه ايه ياشيخ الغفر
شيخ الغفر: جبتلك البت اشاعة يابا العمدة
العمدة: دخلها ياشيخ الغفر
شيخ الغفر ينادي على الغفير يدخل البت اشاعة
العمدة: هيا دي البت اشاعة
شيخ الغفر: ايوه يابا العمدة
العمدة: ومالها مبهدلة في نفسها كده ليه وهدومها مقطعة كده ليه.
شيخ الغفر: اصل حالتهم على قدها خالص يابا العمدة
العمدة: اسمك ايه يابت واسم امك ايه ياروح امك.
اشاعة: انا معملتش حاجة يابا العمدة
العمدة: اتكلمي يابت احسن ابهدلك اكتر ما انتي متبهدلة واسجنك كمان.
اشاعة: انا اسمي اشاعة السيد ولاعة وامي اسمها بهانة.
العمدة: هو انتي بنت بهانة المجنونة؟
اشاعة: بس ماتقولشي مجنونة.
شيخ الغفر: انتي حتردي على العمدة يابت يابنت الجزمة (يلسعها على قفاها)
العمدة: استنى شوية ياشيخ الغفر لما نعرف ايه الحكاية
شيخ الغفر: دي بت شكلها قليلة الادب
العمدة: ايه حكايتك يابت انطقي
اشاعة: حكاية ايه يابا العمدة انا مش فاهمة حاجة خالص
العمدة: انتي دايرة يابت في البلد تقولي ان الريس عنده 140 سنة؟
اشاعة: ريس مين يابا العمدة , الريس متقال.
العمدة: انتي كمان بتتريقي , ظبتها ياشيخ الغفر يمكن تتعدل
اشاعة: انا مش فاهمة حاجة خالص من اللى انتوا بتقولوه
العمدة: يابت ده الناس كلها حدانا عارفة الاشاعة وحفظاها
اشاعة: وهو فيه حد بيعيش لحد 140 سنة في الزمن ده؟
العمدة: انتي كمان حتدخلي في ارادة ربنا
اشاعة: ماهو انت بتقول كلام تخاريف يابا العمدة, كلام مش ممكن حد يصدقه
العمدة: انا بقول كلام تخاريف اما انك بت عايزة الحرق انا حعرف ازاي اخليكي تتكلمي.
اشاعة: انا ما عملتش حاجة يابا العمدة(تعيط)
العمدة: خدها وحطها في الحبس ياشيخ الغفر لحد مانعرف ايه حكايتها.
شيخ الغفر اوامرك يابا العمدة.
شيخ الغفر يرميها في الحجز ويرجع يكلم العمدة.
شيخ الغفر: حنعمل معاها ايه دي يابا العمدة؟
العمدة: مش عارف ياشيخ الغفر بس لازم نشوفلها حل احسن تجبلنا مصيبة واحنا مش ناقصين
شيخ الغفر: انا رايي نكلم المركز يجوا يخدوها هما ونشيل من على قلبنا المصيبة دي
العمدة: انا برضه بقول كده, هاتلي التليفون ياشيخ الغفر.
شيخ الغفر ياتي بالتليفون.
العمدة يكلم المركز
العمدة: الو يامركز الو يامركز اديني المامور ياخويا اديني المامور.
المامور: ايوه مين معايا؟
العمدة: انا العمدة ياحضرة المامور
المامور: خير ياعمدة؟
العمدة: والله مش عارف خير ولا شر ياحضرة المامور انا قلت اكلمك تشوف بنفسك
المامور: ايه الحكاية ياعمدة احكيلي
العمدة: الحكاية ان فيه واحدة عندينا هنا في البلد اسمها اشاعة دايرة في البلد تلسن بالكلام وتقول ان الريس عنده 140 سنة.
المامور: ازاي الكلام ده ياعمدة ازاي.
العمدة : مش عارف ياحضرة المامور وانا حبستها عندي لحد ماتشوف حضرتك نعمل معاها ايه
المامور : خير مافعلت ياعمدة . انا جاي بنفسي بكرة عندك اشوف الحكاية دي.
العمدة: تشرف ياسعادة البيه واهو بالمرة تتغدى معانا.
المامور: ان شاء الله ياعمدة ان شاء الله.
العمدة: مع السلامة يابيه مع السلامة.
العمدة بينادي على البت سعدية: يابت ياسعدية انتي يابت
سعدية: ايوه يابا العمدة:
العمدة: ايه يابت الصوت المايع ده شكلك كده عايزة تتظبتي.
سعدية: هيه هيه هيه
العمدة: يخرب بيت امك روحي يابت ادبحي جوزين حمام على جوزين فراخ عشان عندنا زيارة مهمة بكرة.
سعدية: اوامرك ياسيد الناس هيه هيه هيه
العمدة: يابت الكلب يامايصة
شيخ البلد: ايتها خدمة تانية يابا العمدة
العمدة: انت لسه واقف عندك ياشيخ البلد روح انت وابعتلي الواد حسانين
شيخ البلد : اوامرك يابا العمدة
حسانين ياتي
حسانين: اوامرك يابا العمدة
العمدة: كنت فين يالا
حسانسن: كنت في مولد سيدي البلبولي يابا العمدة
العمدة: انت اهبل يالا احنا هنا في مصيبة وانت رايح تلعب وتتمرجح
حسانين: خير كفى الله الشر يابا العمدة
العمدة: البت اللى اسمها اشاعة دي باين عليها وراها مصيبة وانا كلمت المامور يجي بنفسه يشوف ايه الحكاية
حسانين: الله ينور عليك يابا العمدة
العمدة: علشان الواحد يخلي مسؤوليته ويشيل ايده من الموضوع ده خالص
حسانين: موضوع ايه يابا العمدة
العمدة: انت يالا ضايع انا ايه اللى خلاني ابعتلك روح روح
حسانين: ليه بس يابا العمدة
العمدة: بص يالا انا عايزك تروح تتاصلي عن الاشاعة اللى دايرة في البلد بتقول ان الريس عنده 140 سنة وتجبلي قرار الموضوع ده وتجيلي الصبح بدري
حسانين: من عنيا يابا العمدة
العمدة يروح ينام ويعدي اليوم
تاني يوم الصبح يصحى العمدة على زعيق وصريخ الواد حسانين
العمدة: فيه ايه ياغفر
شيخ الغفر يدخل على العمدة
شيخ الغفر: ابدا يابا العمدة البت بت المجنونة عاملة دوشة في الحبس وعمالة تزعق وتقول انا ماليش دعوة انا معملتش حاجة
العمدة : الله يخرب بتها كمان شوية حنعرف ايه حكايتها لما يجي سعادة المامور هو يشوف شغله معاها
شيخ الغفر: تمام يابا العمدة
يدخل الواد حسانين على العمدة
حسانين: ازيك يابا العمدة
العمدة : مش باينلها خير ياواد ياحسانين
حسانين: بص يابا العمدة انا لفيت واتاصت ولفيت وعرفت ان البت اشاعة دي دايرة في البلد تقول ان الريس مات من زمان واللى موجود دلوقت ده واحد لابس وش شبهه علشان كده عمره 140 سنة ومش حيموت ابدا
العمدة: مش حيموت ازاي يالا كل الناس بتموت
حسانين: ماهو كل ماواحد يموت حيلبسو وشه لواحد تاني ويفضل الريس بتاعنا موجود الى يوم القيامة
العمدة: ينهار اسود ده كلام يودي في داهية يالا. وبعدين ازاي يعملو كده طب ما الناس حتبتدي تتكلم وتستغرب
حسانين: وهو من امتى الناس بتتكلم يابا العمدة والله ده لو بجد ووصل عمره الف سنة محدش حيقدر يفتح بقه , مش كده وبس ده كمان الناس حتصدق ان عمره الف سنة
العمدة: طب اسكت خالص يالا وماتفتحش بقك بالكلام ده احسن نروح في داهية
حسانين: وانا مالي يابا العمدة مش انت اللى بتسال
العمدة: قوام حتبعني يابن القرعة
حسانين: انا مالي يابا انا ماليش دعوة
العمدة: طب اخرص خالص وماتفتحشي بقك بالكلام ده قدام المامور
حسانين: هو المامور جاي
العمدة: ايوه يالا زمانه على وصول.
المامور يصل امام بيت العمدة
المامور ينادي : ياعمدة ياعمدة
العمدة: اهلا اهلا ده احنا زارنا النبي اتفضل ياسعادة البيه دي البلد نورت
المامور: البلد منورة باهلها ياعمدة
العمدة : شرفتنا ياسعادة البيه اتفضل
المامور يدخل ويجلس على الكنبة بجانب المامور
المامور: ايه الحكاية ياعمدة
العمدة : ودي تيجي برضه ياسعادة البيه. احنا لازم نتغدى الاول وبعدين نبقى نقول ايه الحكاية انت عايز تقول علينا بخلا
المامور: ياعمدة والله انا عندي مشغولات كتير زي ما انت عارف ولازم ارجع المركز قبل المغربية
العمدة: والله ماتيجي ياسعادة البيه احنا لازم نتغدى الاول
المامور: خلاص ياعمدة زي ماتحب
العمدة ينادي على سعدية: ياسعدية حضري الغدا بسرعة يابت
سعدية: حاضر يابا العمدة
المامور: وايه اخبار البلد ياعمدة؟
العمدة: البلد بخير وكله تمام طالما احنا تحت ضلك وحماك
المامور: تمام تمام الله ينور ياعمدة
بعد الغدا والذي منه
المامور يسال العمدة
المامور: ايه الحكاية بقى ياعمدة
العمدة: ابدا يابيه بس كل الحكاية زي ما انا قلت لك في التليفون بالظبت ان فيه بت حدانا هنا اسمها اشاعة دايرة في البلد تلسن بالكلام على الريس وتقول ان عمره 140 سنة
المامور: دي باين عليها مجنونة ياعمدة في حد يقول كده برضه
العمدة : ما انا قلت انها مجنونة برضه بس قلت بالمرة انك تشوفها احسن وتشوف نعمل معاها ايه
المامور: تمام ياعمدة هاتلي البت بت الكلب دي
العمدة ينادي على شيخ الغفر: ياشيخ الغفر
شيخ الغفر: اوامرك يابا العمدة
العمدة: هاتلي البت اشاعة من الحجز
شيخ الغفر: اوامرك ياحضرة العمدة
شيخ الغفر يجيب البت اشاعة قدام المامور
المامور: هيا دي اشاعة ياعمدة
العمدة: ايوه ياسعادة البيه هيا دي اشاعة
المامور: ايه حكايتك يابت وايه حكاية الكلام اللى انتي دايرة تقوليه ده
اشاعة: كلام ايه ياسعادة البيه انا مش فاهمة حاجة
المامور: انتي حتعمليهم علينا يابت الوسخة ده انا المامور ياروح امك انت ماقلتلهاش ولا ايه ياعمدة
العمدة: اقولها ايه بس ياسعادة البيه دي مجنونة رسمي
المامور : حنعرف اذا كانت مجنونة ولا بتستهبل .
العمدة: ردي يابت على سعادة الباشا كويس
اشاعة: ارد اقول ايه بس ياناس
المامور: تردي تقولي ايه حكاية الكلام اللى انتي بتقوليه ده
اشاعة: وايه مشكلة الكلام ماهو كل الناس بتتكلم وتقول اي كلام
المامور: كمان الناس بتتكلم انا حبهدلكم ياغجر.
العمدة: يابت الله يخرب بيتك ايه اللى انتي بتقوليه ده .انا مش قلت لك ياسعادة البيه باين عليها مجنونة
المامور: حنعرف حنعرف. انا عايزك يابت تقوليلي ايه الاشاعة بالظبط اللى انتي بتقوليها
اشاعة: ياسعادة الباشا انا بقول ان الريس بقاله زمن عايش يمكن من 140 سنة ودي حاجة مش ممكن تحصل ازاي بس ياناس واحد يعيش 140 سنة
المامور : انتي كمان حتدخلي في ارادة ربنا
اشاعة: يادي النيلة هو انت كمان بتقول كده
المامور: يخرب بيت امك انتي يابت بتردي عليا انتي نهارك اسود. انا حفرجك يابت الكلب
اشاعة: انا معملتش حاجة ياناس.
العمدة: انتي يابت رحتى في داهية خلاص عشان تعرفي تطلعي اشاعات تاني
اشاعة: انا مش بطلع اشاعات انا بقول الحقيقة ياناس هو فيه حد يعيش 140 سنة في الزمن ده حد عاقل يرد عليا
المامور: انتي بتقولي علينا مجانين
اشاعة: انا برضه قلت كده يابيه انت واقفلي على الوحدة؟
المامور: ده انتي نهارك ماطلعلوش شمس
المامور ينادي على عسكري الدرك: ياعسكري ياعسكري
العسكري: ايوة ياسعادة الباشا
المامور: خد البت بت الكلب دي على البوكس
العسكري: اوامرك ياسعادة الباشا
العمدة: حتعملو فيها ياسعادة البيه
المامور: حنعرف شغلنا معاها ياعمدة دي حاجة بتاعتنا احنا بقى
العمدة: تمام ياسعادة البيه
المامور : احنا لازم نمشي دلوقت عشان انا مش عايز اتاخر اكتر من كده
العمدة: بس وحياتك ياسعادة البيه ابقى طمني وقولي ايه الاخبار لما تعرفوا حكاية البت دي
المامور: اكيد ياعمدة طبعا حقولك
العمدة: وابقى برضه طل علينا حتلاقي عندنا خيرات ربنا
المامور: ان شاء الله ياعمدة ان شاء الله
المامور يتاهب للخروج
المامور: طب اقوم انا بقى يلا مع السلامة ياعمدة
العمدة : مع السلامة ياسعادة البيه
العمدة يكلم شيخ الغفر: مش كده احسن ياشيخ الغفر اهو كده نستريح ونبعد عننا الشبهات
شيخ الغفر: الله ينور عليك ياعمدة بس مش كنت تقول لسعادة البيه المامور ان البت دي لو طلعت زي مابيقولو انهم يقولو برضه ان احنا اللى قبضنا عليها اهو برضه يطلع اسمنا في التلفزيون وحاجة كده
العمدة: تصدق عندك حق ياشيخ الغفر بكره ان شاء الله حبلغ سعادة المامور
شيخ الغفر : تمام يابا العمدة
تاني يوم في المركز
المامور ينادي على الظابط حسان: ياحسان ياحسان
حسان: افندم ياسعادة الباشا
المامور: هاتلي البت اشاعة من الحجز
حسان : اوامرك يافندم
حسان ينادي على العسكري: ياعسكري هاتلي البت اشاعة من الحجز
العسكري: تمام يافندم
العسكري يروح يجيب البت اشاعة من الحجز
المامور : انت يابت مش ناوية تقولي حكايتك بالظبط
اشاعة: ياناس ياهو انا مش فاهمة اي حاجة
المامور: انتي حترجعي تهبلي تاني مانتي انكشفتي خلاص
اشاعة : طالما انكشفت زي ما انت بتقو عايزين مني ايه تاني
المامور: عايزك تقولي انتي بطلعي الكلام ده ليه انتي شكلك كده بتشتغلي مع الاعداء
اشاعة: اعداء مين يابيه هيا الحرب قامت
المامور: انتي كمان عايزة الحرب تقوم؟
اشاعة : ياناس ياهو ارحموني
المالمور: مش بقولك انتي باين عليكي بتشتغلي مع الاعداء اللى عايزين يدمروا البلد
اشاعة: انهو بلد ياسعادة الباشا
المالمور : انتي كمان بتتريقي ينهار ابوكي مش فايت
اشاعة : انا تعبت يابيه ارحموني واعملوا اللى انتو عايزين تعملوه
المامور : احنا فعلا حنعمل اللى احنا عايزين نعمله ياروح امك
اشاعة بتعيط
المامور يكلم مدير الامن
المامور: تمام يافندم احنا قبضنا على البت اشاعة اللي دايرة في البلد تلسن بالكلام على الريس وتقول ان عمره 140 سنة وانه مات من زمان وده واحد تاني وملبسينه وش
مدير الامن: ازاي الكلام ده هيا حتدخل في ارادة ربنا
المامور : ماهو عشان كده متحفظين عليها ومستنين اوامر سيادتك
مدير الامن: ابعتلي البت بنت الوسخة دي عشان اشوف ايه حكايتها
المامور: تمام يافندم بكرة الصبح حتكون عند سيادتك
مدير الامن : انت عارف لو البت دي طلعت زي ما انت بتقول فيها ترقية كبيرة ليك ويمكن كمان انا ابقى وزير
المامور: ربنا يخليك لينا يافندم احنا عايشين تحت ضلك وحماك
مدير الامن: مع السلامة
المامور: مع السلامة يافندم
مدير الامن يكلم الوزير: احنا يافندم قبضنا على البت اشاعة اللى دايرة في البلد تلسن بالكلام وتقول ان الريس مات من زمان وده واحد تاني لابس وشه
الوزير: لابس وشه ازاي يعني؟
مدير الامن: يعني لابس ماسك يافندم وانها بتقول ازاي واحد يعيش لحد 140 سنة في الزمن ده ومايموتش
الوزير: هيا حتتدخل في ارادة ربنا دي باين عليها كافرة
مدير الامن: تقريبا يافندم ويمكن كمان تكون ملحدة
الوزير ابعت ورق البت دي طوالي على المفتي وشيخ الازهر وشوف ايه رايهم
مدير الامن: تمام سيادتك يافندم
الوزير: وابقي بلغني باخر التفاصيل
مدير الامن: تمام سيادتك
مدير الامن بيكلم المفتي: احنا قبضنا على واحدة اسمها اشاعة السيد ولاعة دايرة في البلد تلسن بالكلام وتقول ان الريس ازاي يعيش لغاية 140 سنة.
المفتي: لاحول ولا قوة الا بالله هي حتتدخل في ارادة ربنا ؟
مدير الامن: سعادة الوزير امر ان احنا نبعت ملف القضية بالكامل لسيادتك علشان تبت فيها.
المفتي: وهي دي محتاجة بت ، يا ابني دي كافرة وفاجرة بالتاكيد، هو فيه حد يقول الكلام ده ، ربنا يا ابني قادر على كل شئ وله في ذلك حكم.
مدير الامن : يعني سيادتك تؤمر بايه؟
المفتي: دي يا ابني لازم تستتاب ولو ما رجعتش عن اللي بتقوله لازم تعدم طبعا وتعتبر في حكم المرتد نعوذ بالله من امثالها .
مدير الامن: تمام سيادتك يافضيلة الشيخ حنبلغ سيادة الوزير براي حضرتك في الموضوع.
المفتي: تمام يا ابني تمام وابقى بلغ سلامي لسعادة الوزير.
المذيع في التليفزيون: هذا وقد قامت المتهمة اشاعة السيد ولاعة بزعزعة الامن وضرب القتنة بين المواطنين وزعزعة استقرار الوطن والنيل من سمعة السيد الرئيس من خلال اطلاق الشائعات المغرضة ونشر الافكار الهدامةوبناء عليه تقرر تنفيذ حكم الاعدام الصادر من محكمة جنايات القاهرة صباح الغد.
هذا وقد قامت الوزارات المعنية بتهنئة الرئيس بسلامة الوصول الى ارض الوطن بعد ان قام بعملية استئصال الفص الايمن من المخ والعين اليسرى والاذن الوسطى متمنين له دوام الصحة والعافية وطول العمر.
العمدة: شوفت ياواد يا حسانين ماجابوش اسمي في التليفزيون.
حسانين: ربنا يباركلنا فيك يابا العمدة انت الخير والبركة.
العمدة : يلا اهو الواحد يعمل الخير ويرميه في البحر .
حسانين: ولايهمك يابا العمدة ارمي ورا ضهرك .
العمدة: روح روح ياواد ياحسانين انا تعبان وعايز انام.
حسانين: اوامرك يابا العمدة.
العمدة: مع السلامة ياواد ياحسانين
حسانين: مع السلامة يابا العمدة
تعليقات
إرسال تعليق